Каноны. 9 апреля.

Канон мученице Матроне Солунской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

А́гница Твоя́, Иису́се, Матроно,/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя с любо́вию поже́ршуюся Тебе́./ Тоя́ моли́твами,// я́ко ми́лостив, спаси́ ду́ши на́ша.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святая мученице Матроно, моли́ Бо́га о нас.

Боже́ственным безпло́тным чино́м ны́не слику́ющи у все́х вино́внаго Бо́га и я́сно наслажда́ющися богонача́льнаго осия́ния, пою́щия тя́ просвети́.

Припев: Святая мученице Матроно, моли́ Бо́га о нас.

Ра́бий сподо́бивыйся прия́ти зра́к Христо́с Бо́г, свободи́ти сего́ восхоте́в от тли́ и сме́ртных у́з, от и́га рабо́тнаго тя́, му́ченице, неве́сту обручи́.

Сла́ва Отцу́ и Сы́ну и Свято́му Ду́ху:

Же́нский по́л су́щи, вмужи́вшися благода́тию, вознесе́нную горды́ню и хва́лящуюся безме́рно пре́жде истреби́ти мо́ре, не́мощию те́ла Боже́ственною си́лою низложи́.

И ны́не и при́сно и во ве́ки веко́в. Ами́нь.

Богородичен: Две́рь, я́же к на́м Твоего́, Го́споди, соше́ствия, восто́к, и со́лнце, и све́т, та́инственно Тя́ нарица́емаго преесте́ственно облиста́, сугу́ба естество́м Человеколю́бца.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святая мученице Матроно, моли́ Бо́га о нас.

Тве́рдостию по́мысла пребеззако́нную и лю́тую претерпе́ла еси́ тя́жкую му́ку, сла́вная Матро́но всеблаже́нная.

Припев: Святая мученице Матроно, моли́ Бо́га о нас.

Ра́ны боле́зненныя ощуща́ющи, кре́пко терпе́ла еси́, осужде́нием же тмы́ Боже́ственную све́тлость восприя́ла еси́.

Сла́ва Отцу́ и Сы́ну и Свято́му Ду́ху:

Крове́й твои́х то́ки нече́стия огни́ще угаси́ша, ве́рныя же напои́ша богоче́стия вода́ми.

И ны́не и при́сно и во ве́ки веко́в. Ами́нь.

Богородичен: Скрижа́ль, ковче́г, прие́мшу во утро́бе, Пречи́стая, Сло́во Бо́жие безнача́льное, богогла́сно восхваля́ем Тя́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святая мученице Матроно, моли́ Бо́га о нас.

Си́лою Боже́ственною, Матро́но, укрепля́ема, го́рькия влады́чицы избе́гла еси́ рабо́ты, нра́в бо смире́н души́ стяжа́ла еси́, еди́ному Влады́це рабо́тающи.

Припев: Святая мученице Матроно, моли́ Бо́га о нас.

Рыка́ющи, и пия́нством неи́стовствующи, и я́ростию терза́ющися, злочести́вейшая ра́нами ссеца́ше, евре́йским суровство́м, му́ченице страстоте́рпице, те́ло твое́.

Сла́ва Отцу́ и Сы́ну и Свято́му Ду́ху:

Юношеское показа́ла еси́ терпе́ние, в несве́тлых ме́стех заключа́ема, му́ченице, и гла́дом томи́ма, но обрела́ еси́ воздая́ние безсме́ртия трапе́зу.

И ны́не и при́сно и во ве́ки веко́в. Ами́нь.

Богородичен: Златокова́нный све́щник прообразова́ше Бо́га носи́вшую воплоще́нна, заре́ю Божества́ вся́ просвеща́юща, Тя́, и́стинную Богома́терь.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святая мученице Матроно, моли́ Бо́га о нас.

Тя вене́ц све́тел богому́драя похвалы́ стяжа́, Жизнода́вче, и от тмы́ к сия́нию Боже́ственному изы́де.

Припев: Святая мученице Матроно, моли́ Бо́га о нас.

Утверди́ Христо́с на ка́мени ве́ры но́ги твоя́, блаже́нная, к Нему́же испра́вила еси́ му́дре твоя́ стопы́.

Сла́ва Отцу́ и Сы́ну и Свято́му Ду́ху:

Ум боже́ствен вои́стинну, и му́др, и богомы́слен ты́ иму́щи, сия́еши в ли́це му́ченик, Матро́но всеблаже́нная.

И ны́не и при́сно и во ве́ки веко́в. Ами́нь.

Богородичен: Божества́ зра́к и зра́к челове́чества родила́ еси́, Богома́ти, соедине́ние несме́сно по соедине́нию неслия́нному.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святая мученице Матроно, моли́ Бо́га о нас.

Евы ны́не, страстоно́сице, жела́ние объя́ла еси́ смы́сленно, Матро́но, обожа́ема манове́нием непреста́нным, и пра́ведно присносу́щныя сла́вы сподо́билася еси́. [Дважды.]

Сла́ва Отцу́ и Сы́ну и Свято́му Ду́ху:

Ни ра́б во Христе́, ни свобо́дный су́дится, но доброде́тели благообра́зие, благоче́стия нра́вы укра́шена, ея́же показа́лася еси́ твори́тельница, страстоте́рпице непобеди́мая.

И ны́не и при́сно и во ве́ки веко́в. Ами́нь.

Богородичен: Хра́м Тя́ Бо́жий и черто́г зна́ем, ста́мну, све́щник и скрижа́ль, стяжа́вшую вну́трь написа́ние за милосе́рдие вопло́щшася Сло́ва, Всенепоро́чная.

Седа́лен, гла́с 5.

Благоче́стно порабо́тившися Вседержи́телю, злоче́стием влады́чицы не порабо́тилася еси́, честна́я, но претерпе́ла еси́ тве́рдо те́мное заключе́ние и ра́н разжже́ние и преста́вилася еси́ к Бо́гу, богому́драя му́ченице Матро́но, моли́ся о на́с, соверша́ющих па́мять твою́.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святая мученице Матроно, моли́ Бо́га о нас.

С любо́вию и дерзнове́нием отлучи́лася еси́ вои́стинну ко твоему́, всехва́льная, Рачи́телю, благода́рно взыва́ющи: благослове́н еси́ в хра́ме сла́вы Твоея́, Го́споди. [Дважды.]

Сла́ва Отцу́ и Сы́ну и Свято́му Ду́ху:

С весе́лием и ра́достию прешла́ еси́, испо́лнь доброде́телей всеразли́чных, Матро́но, от земли́ к небе́сным лико́м, сла́вная, насле́дие получивши безсме́ртное.

И ны́не и при́сно и во ве́ки веко́в. Ами́нь.

Богородичен: Просвеще́нна, преиспещре́на все́ми доброде́тельми, Сло́во Отчее па́че сло́ва родила́ еси́ воплоще́нное, Ма́ти Де́во, благослове́нна Ты́ в жена́х, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святая мученице Матроно, моли́ Бо́га о нас.

Бога́таго Све́та лучи́ сподо́билася еси́ ви́дети, измени́вшися пло́ти, и в небе́сней ски́нии жи́ти вме́сто ски́нии те́мныя и мра́чныя, иде́же заключена́ была́ еси́, сла́вная: благослови́те, вся́ дела́, вопию́щи, Госпо́дня Го́спода. [Дважды.]

Сла́ва Отцу́ и Сы́ну и Свято́му Ду́ху:

Красе́н вене́ц, и́мже ны́не венча́лася еси́, сла́вная, живонача́льною десни́цею Вседержи́теля, неве́сту бо ви́дя, очервле́ну тя́ крове́й твои́х то́ки, ра́дуяся, уясни́, Ему́же пое́м: вся́ дела́, благослови́те Госпо́дня Го́спода.

И ны́не и при́сно и во ве́ки веко́в. Ами́нь.

Богородичен: Вои́стинну ро́ждши Бо́га, вои́стинну Всечи́стая яви́лася еси́, Ма́ти Бо́жия, и́стинствующее нося́щи, по ко́емждо рожде́нии, богоиме́нство ве́рным. Те́мже сла́вим Богоро́дицу Тя́ богому́дренно, Всенепоро́чная Влады́чице.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святая мученице Матроно, моли́ Бо́га о нас.

Сия́ет мы́сленными светозаре́нии светоно́сный тво́й де́нь, светле́йшими блиста́нии трисо́лнечнаго, му́ченице, сия́ния, в не́мже ны́не моли́ озари́ти пою́щия тя́.

Припев: Святая мученице Матроно, моли́ Бо́га о нас.

Обрела́ еси́ воздая́ния, страстоно́сице, за ра́ны боле́зненныя, небе́сное насле́дие в Це́ркви перворо́дных, сла́вная, в не́йже торжеству́ющи, твои́ми моли́твами на́с соблюди́.

Сла́ва Отцу́ и Сы́ну и Свято́му Ду́ху:

Вои́стинну Христу́ ны́не сочта́лася еси́, безсме́ртному твоему́ Жениху́, процве́тши све́тло боже́ственными Сего́, всему́драя, я́звами и честно́ю кро́вию муче́ния сия́ющи.

И ны́не и при́сно и во ве́ки веко́в. Ами́нь.

Богородичен: Плени́цы мои́х ны́не прегреше́ний разреши́, Де́во Богоро́дице, Яже милосе́рдия Исто́чник ро́ждши, еди́на Богоблаже́нная, и душесла́дости испо́лни, я́ко да досто́йно Тя́ велича́ю.

Молитва

О свята́я, Матроно. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.